Úlfljótsvatn 15. júní 2014

Vöðlurnar gleymdust.

---

Við veiddum fyrir neðan kirkjuna á Úlfljótsvatni. Kirkjan var byggð árið 1914 á fornu kirkjustæði og turninum var bætt við 1924.

Rétt sunnan við Þingvallavatn er vatn eitt kennti við Úlfljót, fyrsta lögsögumanninn á Íslandi. Vatnið er rétt sunnan við Þingvallavatn og þangað héldum við hjónin um helgina.

Sumum veiðiferðum vildi maður helst sleppa að segja frá. Sérstaklega ef það eina sem er í frásögur færandi er eigin klaufaskapur.Við hjónin vorum ein heima um helgina. Laugardaginn nýttum við til ýmissa verka í garðinum en á sunnudeginum verðlaunuðum við okkur fyrir dugnaðinn með því að aka austur í Úlfljótsvatn.

Við höfum aldrei veitt í Úlfljótsvatni svo við gáfum okkur dágóðan tíma til að skoða okkur um í kringum vatnið. Vorum að reyna að átta okkur á hvar vænlegt væri að stoppa til að veiða. Loksins fundum við vænlegan stað. Þegar opna skottið á bílnum sé ég strax að eitthvað er ekki eins og það átti að vera.

Vöðlurnar mínar og vöðlujakkinn héngu til þerris heima í skúr. Ég varð sem sagt að veiða af bakkanum. Skemmst er frá því að segja að engan fundumvið fiskinn.